A nu le pa thawn tithiamaw loin inn a suahsan hnuah mi kut ah a thleng

Tleirawl kum 18 nute cu inn lamah lungawi lonak nei in inn a suahsan ih ni 10 hnu khalah pehtlaih a theih nawn lo.

Mandalay ramthen, Mahar Aung May Mahar Myiang lamzin ih um Ma Kyia Phyu timi nute cu June 10 ahkhan a nu le pa thawn thukam elawknak nei in inn a suahsan.

Inn a suahsan ihsin tuni tiang pehtlaih thei loin a um, tiah theih a si.

Inn a suahsan ihsin a nui’ phone ah vei khat phone a ra lut. Ma Kyia Phyu thawn biakawk nan duh asile tangka thawng sawmnga (50000) in pek a tul tiin mi pakhatin a rak biak thu, Ma Kyia Phyu ih unu Ma Wai Wai cun a sim.

“Ka naunu hi Palaung, Thai le China tong a thiam. Tuni cun a hlohnak ni 10 a kim thlang. Inn lamin kan ngaihtuah zet. Phone a ra ih ka nu an rak bia. Tangka 50000 kan pek asile video call ih biakawk a theih thu ka nu an rak sim,” tiah Ma Wai Wai cun a rel.

A hlomi Ma Kyia Phyu hi kum 18 a kim zo ih a dinhmun ziangvek a si ti an theih lo ruangah a innsang lamin an ruah zet thu a unu cun a sim.

Ma Kyia Phyu hmutu cun Phone number 09-794 984 423 ah pehtlaih hram dingin zangfah an dil.