Kum 2021 Nobel Peace Prize ngahtu Russia thuthang editor Dmitry Muratov cun Ukraine ram buainak ruangih inn le lo nei lo, nauhak pawl bomnak hrangah a laksawng ngahmi Nobel Medal cu lilam in a zuar.
Dmitry Muratov ih Nobel Medal cu June 20, Regufee’s Day ah US, New York khawpi ah lilam a si ih US Dollar 103.5 million in a zuar ngah.
Hi sumpai cu Russia in Ukraine a siim ruangah Ukraine nauhak inn le lo nei lo ih vakvai pawl bomnak hrangah a pe ding, tiah theih a si.
Muratov hin 1991 ahkhan independent newspapers ‘Novaya Gazeta’ timi a rak din ih Philippines thuthang ngantu Maria Ressa thawn 2021 ah Nobel Peace Prize laksawng an ngah tlang.
Muratov ih ‘Novaya Gazeta’ thuthang ah Russia president Putin le acozah a soisel natsat tuk ruangah le Russia in Ukraine ram a siimnak pawl a ngan ruangah hrinhronak a dong ih March thla ihsin a thuthang suah a cawlhsan.
Muratov ih Nobel Medal lilam ih a ngahmi sumpai hi rin hnakin a tam zet ih a hlan Nobel Medal rak lilamtu pawl hnakin a ngah tam sawn, tiah US thuthang pawl in an ngan.
A ngahmi sumpai ihsin tingnga cu tlawmngai pawlkom hnenah a hlu ding, tiah theih a si.
Hitin lilam a tuahnak hi kum 2000 laiah a thuthang Novaya Gazeta ih cangantu mi 6 rori thah an si ruangah anmah hmincawi in lilam a tuahnak san a si, tiah a rel.
Leave a Reply