Kum 21 mi Mg. Thant Shin Linn Htet timi tlangval cu a pa siseh, a nu siseh dothlengnak thape zettu an si.
Curuangah PDF ih lut an fapa cu a cangtheitawk in an bawm ih tu-ahcun a nu rori PDF sakhan ah feh in a fapa rawl a suansak.
Kum 45 mi Nu…(Hmin thup) cu ralhrang in uknak an lak laiah a puakkuai nasa ih a fapa khal lamzawh duhphorhnak ih a tel a kham hrimhrim lo.
Anih cu 1988 laiah ralhrang ih uknak an lak lai rak tep bantu a si ih atu ralhrang uknak lak a ton lala tikah a nun hin a cohlang thei hrimhrim lo.
A hleice in ruahsannak eng neitu a fapa hrangah a zunkhau hluahhlo a si ko.
A fapa hi kum 21 lawng a si ih 2020 hrilawknak ah vote a thla thei fang. 2020 hrilawknak kha a vei khat vote thlaknak a si ih manhla a ti zet.
Asinan ralhrang in 2021, February 1 ah uknak an lak tikah Mg. Than Shin Linn Htet cu a thinheng zet.
Lamzawh duhphorhnak ah a tel ih a phurtu bik lamah a ṭang. A nu khalin dawn loin, “A net tiang feh aw, dungsip hrimhrim hlah,” tiin thazang a pe.
Mg. Thant Shin Linn Htet hi fapa neihsun a si ih a pa hi mahte sumdawnnak nei a si. Anih lawngte tlawngkai rero lai a si.
Duhphorhnak tuahtu pawl ralhrang in an kaih ruangah Mg. Thant Shin Linn Htet cu hriamhrei kai dingin PDF ah a lut lawlaw.
“Dothlengnak luttu hi kan veng ah keimah pakhat lawng ka si,” tiah a sim hngehnge. Curuangah veng sungmi pawl cu a nu le pa hnenah ralrinnak an pe camcin ih annih khal inn hlum ngam loin khaw dangah an rol ve.
A netnak ah khawsung ah um ngam nawn loin tlangpar hriamhrei kai pawl hnenah an nupa in an tlan lawlaw.
Asinan a pa hi hmun dang deuh ah a um ih a nu le Mg. Thant Shin Linn Htet lawngte PDF sakhan pakhatah an umtlang, tiah theih a si.
Mg. Thant Shin Linn Htet ih umnak PDF sakhan ah a nu a thlennak hi a rei hrih lo, 2022 June thla lai lawngah a si.
Tu-ahcun nufa an umtlang ngah zo.
“Tu cu ka nu thawn kan tongaw ngah zo. Ka nu thawn cun deuthlam ih kan um hmanah siangpahrang innpi sungih umtlang vekin ka thei,” tiah a sim.
A nu cu a fapa hrangah rawl a suang ṭheu ih a rualpi dang pawl khalin a zar an to phah thei.
Ralhrang in uknak an lak hlanah Mg. Thant Shin Linn Htet hi phunsang tlawng ṭheh pekte a si ih ramdang ah feh dingin tumtahnak neitu a si.
Atu-ahcun uknak ṭha lo do dingin a zanmang hmanih a man dah lo, hriamhrei kai in hramlak ah an sungkua in caan an hmang.
Dothlengnak hlawhtlin ding ruahsannak pakhat lawng nei in ni a siar ih a nu a kiangih a thlen zo ruangah thlangam zetin tikcucaan a hmang thei thlang, tiah a sim. (BBC).
Leave a Reply