Russia-Ukraine buainak saithawttu misual mangpa Vladimir Putin ih cangvaihnak dokalh in duhphorhnak neitu nunau kum 18 ihsin kum 27 karlak minung 20 pawl cu palik in an kai.
Palik pawl cun an kaihmi nunau 20 pawl cu an hnipuan an hlitter ih lawngfangkheh in an umter hnuah camera in video an zuk.
Duhphorhnak an neihnak hmun hi Russia ram, Nizhny Novgorod ah a si ih nunau pahnih cun palik pawl in an hnipuan hlitter in lawngfangkheh ih an um lai, hnihsuahsainak ah video an la ih an mualphoh thu an rel.
Nunau pawl cu palik rual in an hil vialvial ih an zahmawh le thildang zoh duh ah an dinter thul, an toter thul ih an ke khal an kakter rero.
Cumi cu Phone camera in an zuk ih a mualpho thei pittawp in an tuah, tiah an sim.
Cutin nazi rei nawn an tuahter ih a neta lam cun a roh deuhdeuh. An zahmawh tiangin naite in camera in an zuk.
Duhphorhnak ruangih an kaihmi tlawngta nute Ekaterina Deviatenko kum 18 mi cun thuthennak zung ah a thilton pawl relsuak dingin thuthluknak a tuah.
Palik pawl ih cangvaih dan aatthlakzia, an khawruah niamzia pawl le an hmuhsuamzia pawl a rel.
Palik hotu pakhat cun a hnipuan hlit dingin a fial. Asinan anih cun thlatin dan (thi) a neih lai ruangah a hnipuan a hlih thei lo thu a sim.
Palik hotu cun phualam na hawl tiin a dilnak cu a pom loih a hnipuan cu hramhram in a hlihter thotho. Cumi hnuah din le to, ke kakter a fial bet ih camera in a zuk fawn. Vei 5 rori din le to a thleithlakter, tiah a sim.
Russia sual mangpa Putin cun amah dokalh ih duhphorhnak tuahtu pawl cu a na thei bikih hrem dingah thu a suah.
Leave a Reply