‘Lai meithal’ in SAC ralhrang uknak raltha zetih do hmaisabiktu Chin miphun ralkap pawl cu hmailam khalah SAC ralhrang donak lamzin ah hmaituang vivo hrih dingin NUG Acting President Duwa Lashi La in kum 75 kimnak Chin Miphun Ni ah a sawm.
February 20 ih thlengmi kum 75 kimnak Chin Miphun Ni Diamond Jubilee ah CNCC ih hmalaknak in online tonkhawmnak ah atuvekin NUG Acting President in a simnak a si.
“A liam zomi kum 2 ahkhan Min Aung Hlaing kaihhruai ralhrang pawl cu Chin miphun in nunphung ih neihmi ramtawihnak Lai meithal le dawng-hrolh keng rori in a hmaisabik ah an do.
Hihi Chin miphun ih ralthatzia an pholangnak a si ih cumi hnakih thupi sawn cu Chin miphun hin ziangtuk Democracy an sunlawih ti an langter,” tiah a sim.
Atu dothlengnak kan zohsal tikah Chin miphun ralkap pawl ih pumpeknak ruangah atu-ah Chinram zate deuhthaw tualsung hriamhrei kai pawl in an uk thei zo, tiah kan thei, tiah a sim vivo.
“SAC ralhrang uknak a zunghram ihsin karsiat dingah le kan ruahsanmi Federal Democracy ngah a si theinak dingah Chin miphun in hmaituang in in hruai hram uh,” tiah NUG Acting President Duwa Lashi La cun a sim.
Leave a Reply