Kachin ramkulh, Mogaung peng, Namti khawpi kiangah July 8, zinglam nazi 3 hrawngah ṭek a tla ih lothlam ih riak caw 24 rori an thi, tiah theih a si.
Mogaung le Namti khawpi karlak, Kyawhtaw leikuang ih lothlam ah caw pawl an riak ih ṭek in a tlak ruangah caw 24 an thi, tiah caw neitu cun a sim.
“Himi zan hi thli a huk nasa, ṭek khal a tla zokzo. Ruahpi a tak zet fawn. Himi zan ah Kyawhtaw ih Shan pawl leikuang hnaṭuannak thlam ah caw rual an riak ih vanduainak an tong.
Thlam ban khal a phel sadarh thluh thei. Caw rual khal an zaten an thi ṭheh. A hlanah cun tlangpar ah caw rual an tlangter ih an riak cih ṭheu. Tufang cu hnaṭuan caan a si ruangah leikuang thlam ah an riakter ih ṭek in a tlak hai ruangah an thi,” tiah mi pakhat cun a sim.
Caw thi pawl cu mani lala ah an phum thluh zo, tiah a sim fawn.
Caw rual hi Namti khawpi le Mogaung khawpi ih innsang 9 pawl ih ta a si, tiah theih a si.
2014 mipum siarnak vek asile Mogaung peng ah mipum tingkhat (100000) hrawng an um ih lothlo, thlaicing le ngakai in pum an cawmaw hai.
Leave a Reply